Miðvikudaginn 7. janúar 2015 verður í minnum hafður fyrir eina alvarlegustu aðför að tjáningarfrelsi fjölmiðla á síðari tímum á Vesturlöndum. Hryðjuverkin í París, þegar ráðist var inn á ritstjórnarskrifstofur franska skoptímaritsins Charlie Hebdo, tólf manns skotnir til bana og ellefu aðrir særðir, hafa vakið óhug um allan heim, ekki síst meðal fjölmiðlafólks og annarra talsmanna lýðræðis og tjáningarfrelsis.
Samúð og samstaða almennings með fórnarlömbum árásarinnar birtist með áberandi hætti á samskiptamiðlum og samstöðufundum víða um heim og einnig í yfirlýsingum margra helstu þjóðar og -trúarleiðtoga heims.
Þá sendu ýmsar alþjóðastofnanir og samtök, sem starfa á sviði mannréttinda og tjáningarfrelsis, frá sér yfirlýsingar þar sem árásin var fordæmd.
Thorbjørn Jagland, aðalframkvæmdastjóri Evrópuráðsins, sagði fjöldamorðin árás á lýðræðisleg og evrópsk gildi og að evrópsk stjórnvöld og stofnanir, þar á meðal Evrópuráðið, yrðu að grípa til aðgerða til að tryggja betur vernd blaðamanna og tjáningarfrelsi fjölmiðla í framtíðinni.
ENPA, samtök evrópskra blaðaútgefenda, fordæmdu árásina og minntu á mikilvægi þess að valdhafar í Evrópu verji tjáningarfrelsið með kjafti og klóm, bæði í Evrópu og um allan heim.

Forseti Sambands evrópskra sjónvarpsstöðva, EBU, Jean-Paul Philippot, lýsti yfir djúpstæðum hryllingi og sorg vegna voðaverkanna á ritstjórnarskrifstofum Charlie Hebdo. Með þeim hafi verið brotið gróflega á grunngildi lýðræðislegra samfélaga; tjáningarfrelsinu. Samband evrópskra sjónvarpsstöðva kallaði eftir aukinni vernd til handa fjölmiðlum, í ljósi þess að þeir standi vörð um fjölbreytni, umburðarlyndi og séu ein af grunnstoðum frjáls og lýðræðislegs samfélags.
Dunja Mijatović, sem fer með málefni fjölmiðla hjá Öryggis- og samvinnustofnun Evrópu, ÖSE, sagði hryðjuverkin í París verstu, einstöku árás gegn blaðamönnum á ÖSE-svæðinu síðan stofnunin var sett á laggirnar 1975. Hún biðlaði til stjórnvalda um að þau heiðruðu minningu fórnarlambanna með því að láta verkin tala og tryggja betur tjáningarfrelsi og öryggi blaðamanna. Mijatović minnti á í lýðræðissamfélagi tekur tjáningarfrelsið einnig til tjáningar sem móðgar, hneykslar og raskar hugarró. Hún sagði að ofbeldi gegn þeim sem eru annarrar skoðunar verði ekki liðið. Nú sé enn mikilvægara en áður að stjórnvöld leiti allra leiða til að berjast gegn þrýstingi, ofsóknum og ofbeldi, sem beitt er til að hindra tjáningu hugmynda og skoðana.
Mijatović talaði jafnframt um mikilvægi þess að afnema ákvæði í meiðyrðalöggjöf þar sem kveðið er á um refsingar fyrir móðganir eða guðlast.