Norska fjölmiðlanefndin, Medietilsynet, tilkynnti á föstudag að búið væri að útdeila 308 milljónum norskra króna í ríkisstyrki til dagblaða fyrir árið 2015. Þetta er andvirði um 4,7 milljarða íslenskra króna og skiptist upphæðin á milli 144 norskra dagblaða. Væri upphæðinni skipt jafnt á milli allra þessara fjölmiðla mætti segja að hvert dagblað fengi að meðaltali um 32,8 milljónir íslenskra króna í sinn hlut í ríkisstyrk  á þessu ári.
Á öllum Norðurlöndunum, utan Íslands, eru veittir verulegir ríkisstyrkir til einkarekinna fjölmiðla og eru styrkirnir ætlaðir til þess að auka fjölbreytni og fjölræði bæði á landsvísu og á staðbundnum landssvæðum. Í Noregi hafa ríkisstyrkir til einkarekinna fjölmiðla verið veittir frá árinu 1960. Að undanskildum styrk til ríkisfjölmiðilsins NRK einskorðast stuðningurinn þar í landi við prentmiðla, þ.e. dagblöð sem talin eru standa höllum fæti og dagblöð með takmarkaða dreifingu.