Þann 10. desember var Elfa Ýr Gylfadóttir, framkvæmdastjóri fjölmiðlanefndar, kosin formaður Stýrinefndar Evrópuráðsins um fjölmiðla og upplýsingasamfélagið. (Steering Committee of Media and Information Society, CDMSI). Var hún kosin til eins árs með möguleika á því að verða kosin í eitt ár til viðbótar.

 

Nefndin sem Elfa Ýr tekur við formennsku í fjallar um tjáningarfrelsi, þ.m.t. stöðu fjölmiðla í Evrópu og þau tækifæri og ógnir sem eru til staðar á internetinu hvað varðar tjáningarfrelsi. Í nefndinni sitja fulltrúar allra 47 aðildarríkja Evrópuráðsins og eru þeir sérfræðingar á sviði tjáningarfrelsis, fjölmiðla og internetsins.

 

Elfa Ýr var tilnefnd af mennta- og menningarmálaráðuneytinu sem fulltrúi íslenska ríkisins í stýrinefndinni árið 2014. Hún var áður fulltrúi Íslands í nefndinni á árunum 2006-2011. Í lok tímabilsins var hún jafnframt varaformaður nefndarinnar. Elfa Ýr hefur stýrt málstofum og haldið erindi sem sérfræðingur á sviði fjölmiðla á vegum Evrópuráðsins um árabil. Má þar nefna IGF ráðstefnurnar í Sharmel-Sheikh og Vilnius, EuroDig ráðstefnurnar í Strassborg, Genf og Madrid, ásamt ráðstefnu Evrópuráðsins um tjáningarfrelsi sem haldin var í Strassborg í október 2015.

 

Þetta er í fyrsta skiptið sem íslenskur fulltrúi er kosinn formaður Stýrinefndar Evrópuráðsins um fjölmiðla – og upplýsingasamfélagið.