Nýr fjölmiðill, Útvarp 101, hefur tilkynnt starfsemi sína til fjölmiðlanefndar, en fjölmiðillinn er í eigu Sýnar hf. (Vodafone). 

Nánari upplýsingar um útvarpsstöðina er að finna hér en útsendingar hennar hefjast fimmtudaginn 1. nóvember á útvarpstíðninni FM 94,1 á höfuðborgarsvæðinu og á vefsíðunni 101.live.

Í lýsingu á dagskrárstefnu segir:

Útvarp 101 ætlar að skapa afþreyingarefni á nýstárlegan hátt fyrir ungt fólk og miðla þvert á samfélags- og fjölmiðla. Framleiðsla á útvarpsþáttum um dægurmál, ítarlegar umfjallanir og viðtöl bæði í máli og mynd. Okkar markmið er að auka vægi og virðingu poppkúltúrs á Íslandi með því að fræða, skemmta og búa til rými fyrir ungt fólk í fjölmiðlaumhverfinu á Íslandi.

Stöðin einsetur sér að spila nýja, skemmtilega og framúrstefnulega tónlist. Við ætlum að einbeita okkur að popptónlist og sérstaklega vel að íslenskri tónlist og taka virkan þátt í nýsköpun á íslenskri popptónlist. Við viljum eiga í stöðugu samtali við hlustendur, jafnt sem tónlistarmenn, og vera fremst í flokki þegar kemur að listrænni stjórnun, tónlistarvali og menningarmiðlun. Við viljum vera stökkpallur fyrir næstu kynslóð tónlistarmanna og vera óhrædd við að gefa nýliðum tækifæri. Við viljum vera gagnrýnin en jafnframt hvetjandi og með því stuðlum við að sterkara, jafnara og skemmtilegra tónlistarlífi á Íslandi.