Fjölmiðlanefnd hefur komist að þeirri niðurstöðu að með kostunum Golfsambands Íslands á þáttaröðinni Golfið, sem var á dagskrá RÚV sumarið 2018, hafi Ríkisútvarpið ohf. brotið gegn 2. mgr. 7. gr. laga um Ríkisútvarpið nr. 23/2013.

Málavextir voru þeir að fjölmiðlanefnd barst kvörtun frá Símanum hf. 23. maí 2018 þar sem fram kom að Síminn hf. teldi Ríkisútvarpið ohf. hafa brotið gegn 2. mgr. 7. gr. laga um Ríkisútvarpið nr. 23/2013 með kostun á sjónvarpsþættinum Golfið sem var á dagskrá RÚV þann 22. maí 2018.

Samkvæmt undantekningu frá meginreglu 2. mgr. 7. gr. laga um Ríkisútvarpið nr. 23/2013 er RÚV einungis heimilt að kosta íburðarmikla dagskrárliði og útsendingar innlendra íþróttaviðburða og umfjöllun um þá. Í kjölfar kvörtunarinnar óskaði fjölmiðlanefnd eftir sjónarmiðum Ríkisútvarpsins ohf. sem rakin eru í ákvörðun nefndarinnar.

Hefur Ríkisútvarpinu ohf. verið gert að greiða stjórnvaldssekt að upphæð 1.000.000 kr. vegna brotsins. Við ákvörðun sektar var tekið mið af eðli brots, alvarleika þess og greiðslum sem Ríkisútvarpið ohf. þáði fyrir kostunina.

Ákvörðun nr.1/2019