Ákvörðun 7/2018: Háttsemi Ríkisútvarpsins á auglýsingamarkaði í tengslum við sýningar á HM karla í knattspyrnu 2018 á RÚV – 21. nóvember 2018

Fjölmiðlanefnd lagði stjórnvaldssekt á Ríkisútvarpið vegna kostunar á dagskrárliðnum Saga HM á RÚV og vegna ófullnægjandi birtingar gjaldskrár fyrir auglýsingar og kostanir í tengslum við heimsmeistaramót karla í knattspyrnu, HM 2018 á RÚV.

Í niðurstöðu fjölmiðlanefndar kom fram að Ríkisútvarpinu hafi verið óheimilt að kosta þáttaröðina Saga HM, sem sýnd var á RÚV á fjögurra mánaða tímabili í aðdraganda HM 2018. Teldist þáttaröðin ekki falla undir lögbundnar undantekningar frá banni við kostun dagskrárefnis á RÚV og hafi Ríkisútvarpið því með kostun þáttanna brotið gegn 2. mgr. 7. gr. laga um Ríkisútvarpið.

Þá hafi birting gjaldskrár fyrir auglýsingar og kostanir í tengslum við HM 2018 á RÚV verið ófullnægjandi og farið í bága við 5. mgr. 7. gr. laga um Ríkisútvarpið. Fram kom að Ríkisútvarpið hafi samþykkt að gæta betur að samræmdri birtingu framvegis, þar með talið á vef félagsins, og hafi þegar gert viðeigandi úrbætur varðandi birtingu gjaldskrár fyrir auglýsingar og kostanir á vefnum.

Ákvörðun 7/2018: Háttsemi Ríkisútvarpsins á auglýsingamarkaði í tengslum við sýningar á HM karla í knattspyrnu 2018 á RÚV 21. nóvember 2018