Sérstök fræðsluvika tileinkuð upplýsinga- og miðlalæsi verður haldin í þriðja sinn á Íslandi vikuna 20.-26. október. Um er að ræða árlegan viðburð þar sem lögð er áhersla á vitundarvakningu um mikilvægi upplýsinga- og miðlalæsis ásamt því að bjóða upp á nýtt fræðsluefni með mismunandi þema milli ára.
Meginþema miðlalæsisvikunnar er að þessu sinni stafræn borgaravitund, enda er árið 2025 Evrópuár stafrænnar borgaravitundar í menntun. Við lifum í stafrænum heimi þar sem stór hluti daglegs lífs fer fram á netinu – við vinnum, lærum, höldum sambandi við fólk og tökum þátt í samfélagslegri umræðu í gegnum stafræna miðla. Til að geta nýtt tæknina á öruggan og ábyrgan hátt þurfum við að tileinka okkur stafræna borgaravitund. Stafræn borgaravitund snýst um að skilja réttindi og skyldur í stafrænum heimi, geta metið áreiðanleika upplýsinga, sýna tillitssemi í samskiptum og vernda eigin persónuupplýsingar. Hún hvetur okkur til þess að vera ekki aðeins neytendur heldur virkir og ábyrgir þátttakendur í stafrænu samfélagi, þar sem gagnrýnin og skapandi hugsun ræður för.
Miðlæg miðstöð um félagslegt netöryggi opnuð og vitundarátakinu Líttupp ýtt úr vör
Í ár hóf Netvís – Netöryggismiðstöð Íslands formlega starfsemi og tók þar með hlutverki SAFT sem íslenskt Safer Internet Centre. Í tilefni þess var nýr vefur, netvis.is, opnaður en þar má finna bæði nýtt og eldra fræðsluefni fyrir börn og ungmenni, foreldra og fagfólk. Þá verður vitundarvakningarherferðinni Líttupp hleypt af stokkunum í dag, en hún hvetur fólk til að líta oftar upp úr símanum og vera meira til staðar í raunveruleikanum. Herferðin verður m.a. sýnd í sjónvarpi og á samfélagsmiðlum ásamt því að vera birt í prentmiðlum og spiluð í úvarpi. Samhliða herferðinni verður fjölbreyttum varningi henni tengdri dreift til að minna enn frekar á mikilvægan boðskap hennar.
Opið málþing í Grósku: Líttupp – Vertu með í að skapa heilbrigðara samfélag á netinu!
Miðlalæsisvikan nær svo hámarki með opnu málþingi í tilefni Evrópuársins, sem haldið verður í Grósku, Reykjavík, miðvikudaginn 22. október, frá kl. 12:30-16:30. Yfirskrift málþingsins er Líttupp – Vertu með í að skapa heilbrigðara samfélag á netinu! Málþingið er opið öllum og þátttakendum að kostnaðarlausu. Skráning á málþingið fer fram hér en takmarkað sætaframboð er í boði.
Netvís – Netöryggis miðstöð Íslands, Samráðshópur um Evrópuár stafrænnar borgaravitundar og Tengslanet um upplýsinga- og miðlalæsi (TUMI) standa að málþinginu með styrk frá Mennta- og barnamálaráðuneytinu.
Eftirfarandi stofnanir, ráðuneyti, fyrirtæki og samtök eiga fulltrúa í tengslanetinu:
Fjölmiðlanefnd, Netvís – Netöryggismiðstöð Íslands, Heimili og skóli, Menntasvið Kópavogsbæjar, Skóla- og frístundasvið Reykjavíkurborgar, Mixtúra, Kvikmyndamiðstöð, Landsbókasafn Íslands, Menningar- og viðskiptaráðuneytið, Háskóla-, iðnaðar- og nýsköpunarráðuneytið, RÚV – Ríkisútvarpið, Menntavísindastofnun Háskóla Íslands, Menntamálastofnun, Menntavísindasvið, Listaháskóli Íslands, Háskóli þriðja æviskeiðsins, Háskóli Íslands, Háskólinn á Akureyri, Háskólinn í Reykjavík, Endurmenntun HÍ, Símenntun HA, RANNUM – Rannsóknarstofa í upplýsingatækni og miðlun, Barnaheill, Landsnefnd UNESCO, Persónuvernd, Þjónustumiðstöð Breiðholts, Samstarfshópur um stafræna borgaravitund, Upplýsing – félag bókasafns- og upplýsingafræða, Félag framhaldsskólabókasafna, Samtök forstöðumanna almenningsbókasafna, AwareGO, Embætti Landlæknis og RIFF- Reykjavík International Film Festival.
